Kontsumobidek kontsumoko blog berria jarri du martxan

Blogaren bidez modu atsegin eta errazean heldu nahi zaie eskubideei, betebeharrei eta era kritiko eta arduratsuan jarduteko jarraibideei buruzko alderdi garrantzitsuei. Kontsumoko Euskal Institutuaren webaren eta gizarte-sareetan egotearen osagarri izango da.

Blogeko sarrerak hamar gaitan antolatuko dira:

Oinarrizko nozioak: kontsumoarekin eta arautegiak aitortutako eskubideekin lotutako oinarrizko kontzeptuak dira, hala nola, erreklamazioak tramitatzea edo kontsultak egitea. Kontsumo-ekintza guztietan giltzarri diren terminoak ere sartzen dira: etiketak, bermeak edo publizitatea.
Prestakuntza: atal honetan Kontsumobidek doan eta edonorentzat sustatutako prestakuntza-ekintzak jasotzen dira: ikastaroak, tailerrak, hitzaldiak eta bestelakoak.
Merkatuaren kontrola: ikuskapen-kanpainak egitea eta produktuak kontrolatzea Kontsumobideren egitekorik funtsezkoenetako bat da. Helburua da bere araudiak ezarritako segurtasun-parametroak betetzen direla egiaztatzea.
Erosketak: ondasunak erosteari eta zerbitzuak kontratatzeari lotutako alderdiak dira, hala nola, merkataritza elektronikoa, urruneko erosketak edo saltokitik kanpo egindako erosketak.
Finantzak eta aseguruak: bankuari, inbertsio-produktuei, aseguruei edo finantza-iturriei buruzko berezitasunak biltzen dira hemen.
Produktuak: kontsumo-ondasunek bete behar dituzten baldintzak aztertzen dira hemen, arlo asko eta desberdinetan: elikadura, kosmetika, jostailuak, altzariak, ibilgailuak, eta arropa, oinetakoak eta osagarriak, besteak beste.
Zerbitzuak: besteak beste, laguntza teknikoko zerbitzuak (LTZ), ibilgailuak konpontzeko tailerrak, aparkalekuak, tindategiak edo irakaskuntza-akademiak kontratatzean zein eskubide eta betebehar ditugun jakiteko jarraibideak.
Telefonia eta Internet: Interneten edo telefonia mugikor zein finkoaren kontratazioa aztertzen da.
Garraioa eta turismoa:bidaiekin lotutako egoerak biltzen dira, eta garraiobideen ingurukoak ere bai (aireko, itsasoko zein lurrekoa).
Etxebizitza eta hornidurak: etxebizitza alokatzeko eta erosteko egin beharrekoak aztertzen dira, bai eta etxebizitzako hornidurak ere, hala nola elektrizitatea, gasa edo ura.